Datuak Babesteko Euskal Agintaritzak (DBEA) Europako ekintza koordinatuan parte hartuko du, erakundeek ezerezteko eskubidea nola aplikatzen duten aztertzeko. Ekimen hori Datuak Babesteko Europako Batzordearen (CEPD) 2025. urterako jardueren barruan sartzen da.
CEPDk 2024ko urriko osoko bilkuran erabaki zuen ekintza hori ezerezteko eskubidean oinarritzea ( DBEOren 17. artikulua), herritarrek tratamenduaren arduradunei aurkezten dieten eskaerarik ohikoenetako bat baita, bai eta datuak babesteko agintaritzei erreklamazio gehien jartzen dizkien gaietako bat ere.
Guztira, Europako Datuak Babesteko 32 Agintarik parte hartuko dute ekintza koordinatu horretan. Datuak Babesteko Euskal Bulegoaren kasuan, tratamenduaren arduradunek euskal sektore publikoaren eremuan dituzten jardunbideen azterketa egingo da, jardunbide onak eta ezerezteko eskubidea kudeatzeko egon daitezkeen zailtasunak ebaluatzeko.
Lortutako emaitzak batera ebaluatuko dituzte parte hartzen duten agintari guztiek. Azterketa horretan oinarrituta, herrialde bakoitzean gainbegiratzeko eta aplikatzeko neurri gehigarriak hartu ahal izango dira, pertsonen eskubideen babes eraginkorra bermatuz. Gainera, bildutako datuak txosten orokor batean sartuko dira, Europako Esparru Ekonomikoaren egoerari buruzko ikuspegi orokorra emango duena.
Ekimen hau CEPDk bultzatutako Aplikazio Koordinatuko Esparruaren parte da. Esparru horren helburu nagusia da datuak babesteko agintarien arteko lankidetza indartzea. Aurreko edizioetan, koordinatutako ekintzek hainbat gai jorratu dituzte, hala nola sarbide-eskubidea, sektore publikoak hodeian zerbitzuak erabiltzea eta datuak babesteko ordezkarien zeregina.