Kontseilu Aholku-Emailea

Datuak Babesteko Euskal Agintaritzaren lehendakariak kontseilu aholku-emaile baten laguntza izango du; honako hauek izango dira kontseilukide:

  • Eusko Legebiltzarraren ordezkari bat, Legebiltzarrak berak izendatua.
  • Euskal Autonomia Erkidegoko Administrazio orokorraren ordezkari bat, Eusko Jaurlaritzak izendatua.
  • Lurralde historiko bakoitzeko ordezkari bat, lurralde historiko horrek izendatua.
  • Euskal Autonomia Erkidegoko toki-entitateen ordezkari bat, Euskadiko Udalen Elkarteak izendatua.
  • Kontsumitzaileen eta erabiltzaileen ordezkari bat, Kontsumobide-Kontsumoko Euskal Institutuak izendatua.
  • Bi aditu, bat informazioaren teknologietakoa eta bestea Zuzenbidearen arlokoa, datuen babesaren arloko Zuzenbidean eta jardunbidean ezagutza egiaztatuak dauzkatenak, Euskal Unibertsitate Sistemako unibertsitateek txandaka izendatuak.
  • Aditu bat, Cyberzaintza Euskadiko Zibersegurtasun Agentziak izendatua.

Kontseilu aholku-emailearen osaeran emakumeen eta gizonen ordezkaritza orekatua izateko ahalegina egiten da, trebakuntza, gaitasun eta prestakuntza egokiaz hornituak.

Datuak Babesteko Euskal Agintaritzaren lehendakariak erabakiko du kontseilu aholku-emailea noiz bilduko den; baina sei hiletik behin bildu beharko da, gutxienez.

Kontseilu aholku-emaileak hartutako erabakiak ez dira inoiz lotesleak izango. Halarik ere, lege honen 15. artikuluan aipatzen den araugintza-ahalaren arabera dagokion bezala, lehendakariak legea eta legea bera garatzeko araudia interpretatzeko zirkularrak onartu aurretik, nahitaezkoa izango da kontseilu aholku-emaileak txostena egitea, hargatik eragotzi gabe txosten horiek ere lotesleak ez izatea.

Hemen aurreikusita ez dagoen guztian, Datuak Babesteko Euskal Agintaritzaren Estatutuak ezarriko ditu kontseilu aholku-emailearen araubidea, antolaketa, eskumenak eta funtzionamendua.

Gaur egun, Datuak Babesteko Euskal Agintaritzaren Kontseilu Aholku-emaileko kideak honako hauek dira:

Eusko Legebiltzarraren ordezkaria, Eusko Legebiltzarraren Mahaiak izendatua 2013ko otsailaren 19ko bileran:

  • Montserrat Auzmendi del Solar andrea, Eusko Legebiltzarreko legelaria.

Euskal Autonomia Erkidegoko Administrazioaren ordezkaria, Jaurlaritzaren Kontseiluak 2024ko ekainaren 30eko Erabaki bidez izendatua:

  • Agustín Zubillaga Rego jauna, Administrazio Digitalaren eta Zerbitzu Orokorren Sailburuordea.

Lurralde historikoen ordezkaria, Foru Aldundien arteko erabaki bidez izendatua:

  • Igor Canoura Otermin jauna, Gipuzkoako Foru Aldundiak izendatutako ordezkaria.

Euskal Autonomia Erkidegoaren lurralde-eremuko toki-erakundeen ordezkaria, EUDELek izendatua:

  • Raúl García Ezquerro jauna, Biasteriko alkatea.

Informatikako aditua, Euskal Herriko Unibertsitatearen errektorearen 2004ko azaroaren 29ko Ebazpenaren bidez izendatua:

  • Eduardo Jacob Taquet jauna, unibertsitateko Ingeniaritza Telematikoko katedraduna.

Oinarrizko Eskubideetan aditua, Euskal Herriko Unibertsitatearen errektorearen 2004ko azaroaren 29ko Ebazpenaren bidez izendatua:

  • Iñaki Esparza Leibar jauna, Zuzenbide Prozesaleko katedraduna.

Egun, Kontseilu Aholku-emailearen lehendakaria Javier Bikandi Irazabal jauna da.

Orrialde hau partekatu